Prisión domiciliaria a los huelguístas: Iñapysẽ ko’ẽti

(Omoñe’ê Esteban Ortega) Ñane ko’ẽvo ko domingo porãite oguahẽ peteĩ vy’a ijojaha’ÿva ñane ñe’ã mbytetépe jaikuaáre oñeme’ẽ hague umi 5 huelguístape iderécho: prisión domiciliaria. 

Prisión domiciliaria a los huelguistas: Iñapysẽ ko’ẽtiUpe miércoles 9 de abril ningo ñaha’arõma voi kuri kóva. Upérõ karai juez, Saltos del Guairápe oĩva ojopyjopyve uvei hendive kuéra. Ha’ete voi ku he’íva ko Paraguáipe oĩnte va’erã oiko porãva ha iguyre katu oiko asýnte va’erã voi.

Upe guive heta jey añeporandu: Mba’ére piko noñeinvestiga pypukúi ha hekoitépe upe oiko va’ekue Curuguatýpe ikatu haguã maymave jaikuaa…  Maerã piko jaipota peichagua poder omoĩ rangue tekojoja omoĩva teko joja’ÿ, téra piko oimo’ã pueblo itavy eterei ha ndoikuaái ete voi mba’e iderécho…  Ha’e kuéra  piko oimo’ã oguereko haguére ipoguýpe medios kuéra,  pueblo ogueroviapátama ichupekuéra… ha’e kuéra piko oimo’ã mbaretépe la pueblo okirirĩvéta.

Añetegua ipu’aka japu rehe

Mba’e piko oiko ra’e Curuguatýpe…  Qué pasó en Curuguaty? ko porandu  are guivéva ñahendu ha ñahenduvéta ojekuaa porã meve añetetehaitépe mba’etépa upe oiko va’ekue.  Hesakã porãmba peve máva ha mávapa masacre apohare ha katu ndaha’e mo’ãi ojeitytanteva tapicha inocente apére. Tekotevẽ jaikuaa pe añetegua oiko haguä justicia.

Heta Radio comercial ha tele kuéra aréma naimandu’avéi voi: Mba’e piko oiko ra’e Curuguatýpe, ha’ete voi ku hesakãmbáma va’ekue, ojapeténtema tapichami ikangyvéva apére ojapoha tembiapo vai. Umíva ko’ẽ ko’ẽre omyasãi japu, ñe’ẽrei, “Guelele rei”  kachiãi ha omoingese ñande apytépe  py’aro, ñokarãi, kangy ha opaichagua tekove vai. Upéva renondépe heta tapicha ohekáva tekoporã ojoaju ha oñopytyvõ, oiporu medios alternativos opaichagua: internet, radios populares, ñemongeta, terere jere, ha mba’e ikatu haguã omoguahẽ ojupe marandu hi’añetéva ha péicha ipu’aka japu rehe. Oñemongu’e paite kuri: movimientos sociales, políticos, religiosos, intelectuales ko ñane retä ambue tetãre ikatu haguã ko’ã ñande rapicha huelguista ani hekove jei ñande apytégui.

Tekotevẽ ñañomoiruve

Tuicha mba’e hína ko prisión domiciliaria ojehechakuaa, kóva rupive 5 ñande rapicha rekove ñamoingove jey, iporãma tokaru jey hekopete; ha katu ne’ĩra ñaguahẽ hu’ãme, hemby gueteri heta ñane rembiaporã ñamoĩ haguã tekojoja ñane retã Paraguáipe, ha péva pueblo mante ikatu ojapo. He´iháicha ku purahéi Tetaygua Sapukáipe:

“…. Iñapysẽ ko’étĩ, pytã morotĩ, hovy

Ñande poyvi joguaha,osẽ la kuarahy,

Hesakãmba porãitéma, ñande rape pyahurã”

Marinakue, pueblo mba’e.

 

Comentarios

Publicá tu comentario

Este mensaje de error solo es visible para los administradores de WordPress

Error: Las solicitudes de API se están retrasando para esta cuenta. No se recuperarán nuevas entradas.

Inicia sesión como administrador y mira la página de configuración de Instagram Feed para obtener más detalles.