Juan Tóro Káso ñemombe’u, guarani árare

*Juan Tóro

 

Amombeúta ndéve, che memby, peteî káso oikova’ekue yma che vállepe, amo Itápe.

Che arekórõ guare 35 áño…ha ko’ãga areko 81 áño… ¿Mboy áño guarétepa la amombe’útava aína ndéve, che memby? …Ha guéno,  oĩva’ekue peteĩ  kuimba’e tie’ỹ, laja vai, hérava Juan Tóro. Heê, Juan Tóro  oje’évarâ chupe.  Che mandu’a porââ hese. Oiméne oguereko raka’e upérô 38, 40 áño mba’e. Peteî moreno akãrague akua, hû vera la hi’áva, iñakãrague puku’i. Oipor’uva’erâ jepi sombrero áncha, hûva, ha sapatu bota’i, ha kamisa akuádro. Hete elegante va’ekue. Oiko jepi va’erâ peteî kavaju hû porâ ári. Péa ha’eva’ekue la Juan Tóro.

Ojekyhyjepava’erâ jepi chugui irretovadoieterei haguére. Hetaiténdima ndajeko oñorãirõ, ha hetaitépema ndajeko oikutu ha ojuka. Pórque ha’e ndaje raka’e kyse’ỹre nosẽi voi. Ha fero arriero voi va’ekue.

Che mandu’a ningo ojekyhyjépava chugui la bailehápe ohóramo. Ha’e oguahẽ vove, ohopáma la hénte.  Pórque  oguahẽ ha oiporavóma katu máva kuñataîpa ohayhu,  ha upe ohayhuvéva ojagarrava’erã la bailehágui ha kavaju ári ohupi ijyvágui ha ogueraha, ogalopeaa ohóvo. Heta mitakuña porâ ha guénare ojapova’ekue upéicha.

Domingokue katu ohova’erâ tapére ikabaju ári opeska kuñataikuéra tupaógui osêvare. Ha ohecharô peteî ogustáva chupe, ohupíma katu ijyvágui ikavaju ári ha oraha,  ogalopeaa ohóvo. Ndoroikuaái moõpa oraha. Ha ágã ha’e ogusta vove, opoi jey chugui.

Ha merkado jerére upéicha avei ojapo. Oîva’erâ jepi ikavaju ári merkado eskinape, opeska haguâ kuña osêva terâ oikévare upépe. Che mandu’a mba’éichapa umi mitakuña kuéra ojere chugui okyhyjégui. Ha, ha’e haguéicha ndéve, ohecha vove  máva ogustáva chupe, oseguí ha ohupi ha ogueraháma katu… ogalopeaa ohóvo.

La Juan Tóro túvako oikuapa la ita’ýra delihéncia. Ndoikuaái mba’épa ojapóta chugui. Upévare, pya’e pya’e omohendapa itajyrakuérape. Omomenda ápe ha pépe pono Juan Tóro ojavyky hese kuéra. Heê…oguerokyhyje chugui. Péro pe itajýra majórape katu ndaikatúimi omomenda. Upe majóra, la soltérava opyta oiko isy ha itúvandi.

Peteî díape, oguapyhína pe iñermana majóra hóga renondépe, ha Juan Tóro he’imi chupe:

-Nde, nde hulána, ndéko hetaitereíma re’u rei.  Ndéngo re’u reietereíma, ha rejapoháma ningo álgo avei.

He’i rire chupe upéicha, ohupi ikavaju ári ha ogueraha. Ndoikuaái la itúva ha isy moõpa ogueraha la iñermánape. Upémarô ohekauka. Mombyry, ndaikuaái che mba’e puéblopepa, ogueraha chupe ra’e. Ogueraha chupe peteĩ kotýpe. Omoinge upépe, ollavea chupe ha un mes oguereko hendive, la iñermánape. Upéicha ojapomi nde…

Che ndaikuaái mba’érepa noñedemanái chupe la polisiápe. Heta mitãkuña ogueraha  ha avave nopenái hese. Ha upechahágui ohórõ preso, sapy’aite oho ha osẽ jeýma. Ha oñepyrû jeýma katu ogueraha la mitãkuñakuérape.

Unave omondami peteî kuñataĩ Potrero po’iguápe, oîva namombyrýi Ita puévlogui. Omonda,  ogueraha chupe ndojekuaái jeýma moópa. Oñomiete la mitãkuñáme.  Oraha are chupe. Oho ombo hyeguasu ha uperire ogueru. Entoncerâmo, la mitakuña túa he’i chupe:

-Erúna chéve la che rajy, aníkena rejapo hese mba’eve.

–Guéno, araháta ndéve la nde rajy, péro hyeguasu rire- Orresponde chupe Juan Tóro.

Mése rire, hyeguasupámarô, ogueru la karai rajýpe.

-Na’ápe aru ndéve la nde rajy- He’i chupe.

–Anivéna péicha rejapótei chamigo. ..-, He’i chupe mitakuña túa

–Ágã ajapose jeyha’óra, ága che gustaha’óra, araha jeýta ndehegui-, okontesta Juan Tóro mitãkuña rúpe.

Upe mitãkuña oguerekova’ekue avei mokõi ermáno. Ko’âva he’i avei Juan Tórope:

-Anivéna péicha rejapo.

-Ajapo jeýta- okontesta avei chupekuéra.

Trre vése ogueraha upe karai rajýpe. Trre vése ombohyeguasu  ha uperire ogueru ha ontrrega chupe. Ha pe trre vesehápe, kuñataĩ túa he’íma Juan Tórope:

-Ko trre vése rejapo, péro cuatro veseha nderejapomo’ãvéima.

– Ajapo jeýta hese chegustáha’óra-, okontesta chupe Juan Tóro.

Avei umi mokôi mitakuña ermáno he’i chupe:

-La Juan Tórorô nde, rejapo jeyrô orerehe upéicha, reñedefendétamante-

-Ha añedefendéta-, okostesta chupe kuéra.

Ha Guéno, ohasa upéicha la tiémpo.  Áño rire, oñemboja jeýma ñande ra’y tie’y Potrero po’i gotyo. Ojemboja  mitakuña róga jerere ogueraha haguâ jeýma chupe. La mitãkuña róga oĩ una cuadra peteĩ  volichítogui. Upéicha, volichíto niko oje’éva yma oje’uhápe káña, mortadéla ha mba’e. Ha upéicha, ou jeýma upépe hína, la kuñataĩ róga ypýpe. Ou jeýma ha’e. Ha he’i chupe la kuñakarai, la volícho jára, kóicha:

-Anína, anínatei, terehóna, ápe ningo hi’aguĩ che vecina rógagui, che aprovlemáta ningo.

-Nahániri, epena’ỹ upévare -he’i chupe- Epena’ỹ upévare nde kuñakarai.

Uperiremíntema katu ohóma chupe kuñataî ermanokuéra la volíchope. Oguahẽ porâ hikuái upépe ha peteî he’i Juan Tórope:

-Rojúma…

-Peguahẽ katu –ombohovái chupe.

-Ndéve piko oje’e la aipo Juan Tóro- oporandu chupe mitâkaria’y

–Upéicha oje’e chéve-Okontesta chupe karia’y  safádo.

Upémaramo, mitãkuña ermáno he’i chupe:

– Eñedefendéntemava’erâ…Ha oho Juan Tóro ári umi karia’y mokôi ha la ituvakuéra.

Ymáminingo ndojeporúi la rrevólver. Kysénte voi, kyse machéte la ojepurúva. Ha oñoha’ãma katu hikuái la kysépe, oñorãirõma voi katu. Ha peichaháguinte ja oikutúma katu peteî la Juan Tórope. Ha oikutúma katu avei chupe pe kuñataî túa. Entre tréspy ha’ekuéra, ha Juan Toro katu ha’eñónte. Ha ojehecha vaímarõ ñande ra’y tie’ỹ, oike la kuñakarai kotýpe, la volícho jára kotýpe. Upépe oike chupe umi trre típo. Ha oñorãirõ jey hikuái pe kotýpe. Ha ojecha vaívéntemarô, Juan Tóro oike  tupa guýpe, ha upépe katu che kompañéro oikutuvéntema chupe águi, amógui, ágotyo, amógotyo, ápe ha pépe…Oikutu hetaiterei chupe. 18 térãmo 28 puñaláda omoĩ chupe hikuái. Ha upépe, pe tupa guýpe, omano la Juan Tóro.

Che mandu’a porâ che memby,  rosêmbarõguare kállepe rohendúmaramo omanohague la Juan Tóro. Hénteko omaña la kárrore osêva komisaríagui mbeguemi oúva hína la te’onguére.  Ha uperiremínte katu rohecháma la te’ongue morotî puku hyepýpe. Ha la hénte he’i: “Omano la Juan Tóro, omano la Juan Tóro…”.  Ovy’apa la hénte. Ovy’apa la omanohaguére la Juan Tóro.

Ha upéicha va’ekue la Juan Toro káso, che memby. Karia’y neformalva, omanova’ekue  iléipe.

 

*Ko káso omombe’u va’ekue Ña Mercedes de Ortiz Arístides Ortiz pe.

Comentarios

Publicá tu comentario

Este mensaje de error solo es visible para los administradores de WordPress

Error: Las solicitudes de API se están retrasando para esta cuenta. No se recuperarán nuevas entradas.

Inicia sesión como administrador y mira la página de configuración de Instagram Feed para obtener más detalles.